Lasterketako azken bederatzi edizioetan ez da aldaketarik izan, lehenengoan Zabola auzoan hasi eta Kurtzeta gainean amaitu zutelako lasterketa: "Ordutik ez da aldaketarik egin. Urteren baten antolatzaileek Gantzagatik Ibarrara jaisten Andramariko bidegurutzea hartzeko proposamena egin zuten, baina jendeak arriskutsuegia zela uste zuen, autoak aldapa behera azkar etorriko zirelako, eta kurba itxia dagoelako hor. Hala, baztertu egin zen proposamen hura, eta bederatzi urte hauek ibilbide berarekin egin ditugu", adierazi digu antolatzaile lanetan dabilen Inhar Amenabar pilotuak.
73 pilotu irteeran
Zapatuko lasterketarako 73 pilotuk eman dute izena. Igoeratan debagoiendar mordoa dabilen arren, rallysprintean ibarreko ordezkaritza ez da horren zabala izango. Inhar Amenabarrek (R5 GT Turbo) Agurtzane Zubieta izango du kopilotu lanetan, horiek izango dira Aramaioko ordezkariak. Eskoriatzatik, berriz, Gorka Idigorasek (Opel Astra GSI) Joseba Frutosekin osatuko du taldea, eta Oñatitik Aitor Arnaitz (R5 GT Turbo) eta Joanes Uria etorriko dira.
Eta, lasterketan aurrealdean ibiltzeko borrokan ibiliko dira, besteak beste, Angela Vilariño, Tricio, Labaka, Jaio... Hala, ikusteko dago Errioxatik etorriko diren Moro anaiek ze maila emango duten: "Denbora onak egiteko gaitasuna duten autoak ekarriko dituzte-, Mitshubishi EVO 6 autoa batek, eta BMW M3 autoa besteak. Ikusi egin beharko da ze lan egiten duten".
Hankook Koparako baliagarria
Biharko lasterketa, bestalde, puntuagarria izango da Hankook Koparako. Horretarako, derrigorrezkoa izango da etxe horretako pneumatikoekin korritzea, eta horrek ere orain arte Aramaion egon ez diren pilotuak erakarriko ditu probara.