Indusketa proiektua herriari zabaltzea da Udalaren eta Aramaioko Ondarearen Berreskurapen Taldearen asmoa. Aurreko asteotan Aramaio bailarako gerra denborako trintxera batzuk lokalizatu eta trintxeren mapa egiteko auzolanean jardun dute. Aramaio, Aretxabaleta eta Arrasate erdian dagoen mendi tontorra da Murugain.
Domekan, uztailaren 31n, bisita gidatua izango da Etor Telleria arkeologoaren eskutik eta bertan parte hartzeko gonbidapena zabaldu dute. 11:00etan elkartuko dira frontoi aurrean.
Gasteizko Ondare Babesa elkartea da uztailaren hasieratik indusketa lanak egiten diharduena. Esan bezala, Aramaioko Ondarearen Berreskurapen Taldeak eta Aramaioko Udalak bultzatu dute proiektua. Irailean proiektuaren balorazioa iritsiko da. Era berean, Espainiako gerraren inguruko mahai ingurua egiteko asmoa daukate.