Erreferenduma egin zuten atzo Arabako EB-Berdeak-eko militanteek, erabakitzeko zer egin eguenean Arabako Batzar Nagusietan. %84k erabaki zuen beren hautagaiari, Nerea Galvezi, bozkatzea dela onena eta, honenbestez, ez babestea Xabier Agirre EAJren hautagaia. Honek, EAJren (13) eta Bilduren (11) botoak ziurtatuta dauzka, baina beste birenak ere behar du, PP baino gehiago izateko. Izan ere, popularrek, PSE-EErenak (9) ere ziurtatuta dauzkate, 25 guztira.
Negoziazio luzeak
Azkeneko asteetan negoziazioetan ibili dira EAJ eta EB-Berdeak. Baina ez dira akordiora irtisi eta, azkenean, bihar zer egin erabakitzeko erreferenduma egitea erabaki dute EB-Berdeak-eko Arabako militanteek. Erreferendumean, alde nabarmenez, EAJri botorik ez ematea erabaki dute. "Militanteen erabakia betearazlea da; ez espero azken orduko ezustekorik biharko bozketan" adierazi du Kontxi Bilbao Ezker Batuko eledunak.
Hortaz, Javier de Andres aukeratuko dute bihar Arabako Batzar Nagusiek, Arabako ahaldun nagusi. Azkeneko lau urteotan agintean egon den Xabier Agirre ordezkatuko du de Andresek.
PPrekin ituna?
Iñaki Gerenabarrena Araba Buru Batzarreko presidenteak adierazi du susmoa duela PPrekin ituna egina daukala EB-Berdeak-ek; izan ere, negoziazioak "kafkianoak" iruditu baitzaizkio jeltzaleari. Hiru bider aldatu dituztelako EB-Berdeak-ekoek negoziatzeko kideak.