Ganauak badatoz jaixetara jarri diozu izenburu kartelari. Nondik etorri zitzaizun ideia?
Behi koadrila bat jaietan murgilduta islatu gura izan dut. Behiak erabili ditut pertsonaia moduan eta, bestetik, han bai dauela ganaue! esaldia erabiliz, Aramaion eusko label eta kalitate oneko ganadua dagoela islatzea nahi izan dut. Eta, noski, kanpotik datozenak ganadu horrengana datozela! (barreak). Zentzu bikoitz hori aprobetxatuz, txantxa kutsua eman nahi izan diot irudiari.
Animaliak protagonista, beraz.
Aramaio baserritik bizi den herria izanda, animaliekin zerbait egitea gura nuen. Hala, pentsatu nuen behiei protagonismoa emanda kartela egitea. Behi koadrilak Aramaioko jaietan, erromerian eta jai giro onaz gozatzen dabiltzala, hori erakutsi nahi nuen. Gainera, kanpotik ere jendea –behiak hauek ere– animatzen direla erakutsi dut, bertako giro eta kalitateko oneko ganaduen bila etortzen direnak.
Lehiaketa hirugarrengoz irabazi duzu jarraian. Epaimahaikideen gustuak ezagutzen dituzu, ala?
Duela hiru urte aurkeztu nintzen lehenengoz. Lehenengoan proba moduan eman nuen izena eta hortik aurrera jaietan egoterik izan ez dudanez, beste modu baten parte hartzeko aukera ona dela deritzot. Hori bai, nahiago nuke jaietan egotea! Ideia ezberdinak aurkezten saiatu naiz eta pozik nago nire lana epaimahairen gustukoa delako. Amaitzeko, aramaioarrei eta inguruko herrietakoei jaietan gozatzera animatu gura diet, nire partez ere disfruta dezatela. Goraintziak denoi!