Arexola eta Arriola auzoetako bizilagunek antolatzen dute, eta Orixol mendirako gailurrera bidean dagoen Santi Kurtz ermita ondoan dagoen txabolan egingo dute ospakizuna. Josu Olaizola Arexola auzoko alkateak adierazi duenez, eguraldi ona egin duen urteetan jende asko hurbildu izan da ermitara: "Aramaioarrak izaten dira gehienak, baina mendi bueltatik datozen beste asko ere etortzen dira", adierazi du.
Meza, eguerdian hasita
Meza izango da eguneko lehen hitzordua: 12:00etan izango da, ermitan bertan. Gero, 14:00etatik aurrera, jatekorik eta edatekorik ez da faltako ermitatik 200 metro ingurura dagoen txabolan: salda beroa eta txorizoa izango dira, besteak beste. Pintxoak ez dira doakoak izango, baina prezio sinbolikoa izango dute, hau da, gastuak estaltzea da helburua. Eta noski, ospakizunari giroa emateko, trikitixa doinuak entzun ahalko dira.