Aramaioko Bilduk aurkezpen ekitaldia egin zuen atzo. Aramaiorako duten programaren nondik norakoak azaltzea zen ekitaldiaren helburua. Gonbidatu berezi bat ere izan zuten: Gipuzkoako Batzar nagusietarako hirugarren doan Ander Rodriguez arrasatearra izan zen bertan.
Bilduk Euskal Herrira ilusioa ekarri duela adierazi zuen Rodriguezek eta koalizioak programarik erakutsi ez duela diotenen aurrean honakoa adierazi zuen: "Ilegalizazioaren mamua izan dugu atzetik eta oraindik ere hor daukagu, mehatxua ez da desagertu. Proiektu zehatzak ditugu, baina azken hilabetean oinarrizko eskubide bat aldarrikatzen aritu gara; hauteskundeetara aurkezteko eskubidea, hain zuzen. Baina, oztopoak oztopo, Bildu hauteskundeetan egongo da".
Koalzioaren lana hauteskundeetatik haratago dagoela defendatu zuen Rodriguezek: "Bilduk etorkizun handia dauka. Hauteskundeen ostean Euskal Herria eraldatzen jarraituko dugu eta aldaketa hori atzeraezina izango da".
"Herritik Udalera eta Udaletik herrira"
Zerrendako kide diren aramaioarrek Aramaioko Bilduk eskainiko duen programa azaldu zuten arloz arlo. Herritik Udalera eta Udaletik herrira doan kudeaketa da koalizioaren ardatza, eta herritarren parte-hartze aktiboa izango da euren lanaren oinarri.