Hain justu ere etxean, Aramaion kantatu zuen Igoak zapatuan, txapelketako finalerdian. Asier Otamendi sailkatu zen zuzenean finalerako, eta batutako puntuei esker Iñaki Viñaspre ere bai. Xabi Igoa hirugarren izan zen. Kultur etxea beteta zela, saio polita atera zen.
Otamendi eta Viñaspre faboritoek ez zuten hutsik egin, baina Rikardo Gonzalez de Duranak, Ekaitz Samaniegok, Izar Mendigurenek eta Xabi Igoak ere maila polita eman zuten, zenbait gorabeherarekin.
Pozik geratu zen Igoa egindako lanarekin. Doinu eta errima zailak hautatuta, kartzelan gaia emanda egindako bigarren bertsoan estu samar ibili zen, baina gainontzean polito. Asier Otamendik berak ere oso fin ikusi zuen Arabako bertsolaritzako promesa deitu zuena.