2010eko apirilaren 14an epaitu zuten Asier Agirre, Aramaion AHTren gaineko herri galdeketa egitearren (2007ko irailean). 9 urteko inhabilitazioa eskatu zuen fiskaltzak, prebarikazioa eta desobedientzia leporatuta, eta Arabako Auzitegi Probintzialak zazpi urtekoa ezarri zion, prebarikazioarengatik.
Herritarren ekimena
Orain, baina, alkateak aurkeztutako errekurtsoa onartu, eta auzitegi probintzialak dio Aramaioko herri galdeketa “herritarren ekimena” izan zela, AHTren gainean galdeketa egiteko sinadurak batu zituztela. Eta alkateak ez zuela ezertan lagundu herri galdeketa hori gauzatzen.
Auzo-alkateen hauteskundeak
Onartzen du herri galdeketaren egunean Aramaioko Udaletxea zabaldu zutela, baina auzo-alkateak aukeratzeko hauteskundeak izan zirelako; eta dio trenaren gaineko herri galdeketarako hautestontziak laga izana arrunta dela Aramaion, Udalak gauza bera egin izan duelako bestelako ekimen pribatu batzuetan.
Emaitza, udaletxearen atean itsatsita
Eta besteak beste, Auzitegi Probintzialak onartzen du, baita ere, herri galdeketarako botoak ez zituela Udalak egin, eta ez zirela egin, ezta ere, alkatearen enkarguz; eta gaineratzen du herri galdeketaren emaitza udaletxearen atean itsatsi zutela, baina jakinarazpen hark ez zuela Aramaioko Udalaren idazpururik.