Udalaren eskutik, haur eta gurasoendako aisialdi eskaintzak ez du etenik izango. 2010ean besteak beste, honako txoko hauek bisitatu zituzten, urritik abendura artean: Tolosako txotxongiloen museoa, Donostiako Kutxaespacio gunea eta Mungiako Olentzeroren etxea Izenaduba basoa. Beste irteera aipagarri bat izan zen Araba hegoaldeko Izki parke naturalera egindako irteera –beheko argazkian–.
Bada, otsailean eta martxoan goi mailako saskibaloia izango da protagonista. Caja Laboral Baskoniaren bi partidu ikusteko aukera eskainiko du Udalak oso prezio merkean. Otsailaren 20an Caja Laboral eta Granadaren arteko partidua ikusteko ez dago lekurik, eta jende asko geratu da kanpoan. Beraz, martxorako beste irteera bat antolatu dute; lehentasuna izango dute otsailean kanpoan geratu direnak.
Ordain-agiria, udaletxera
Martxoaren 20an Caja Solen aurka jokatuko du Baskoniak. Izena emateko azken eguna da martxoaren 2a. 1996 eta 2006 artean jaiotakoek bost euro ordaindu beharko dute eta 1995a baino lehenagokoek, berriz, 7,5 euro. 10 urtetik beherakoak heldu batekin joan beharko dira. Izena emateko, ordainketa hemen: 2097 0224 98 0102679817. Ordain-agiria udaletxera eraman behar da.