Jendetxoa ibili da Aramaioko produktuen azokan. Dena dela, saltzaile gehienek adierazi digute ez dela larregi saltzen gaurko egunez, aramaioar askok omen dituztelako etxean gaur azokara eraman dituzten produktuak: "Kanpoko jendeak erosten du gehien", esan digute. Fruta, barazkiak, eztia, gazta, artisau lanak... ziren gaurko azokan. Eta ganadua ere bai: ardiak, behorrak, ahuntzak, behiak...
Erretiratuen eguna ere ospatu dute gaur herrian. Meza izan dute eguerdian, eta amaieran Lagun-Artean dantza taldekoen saioa ikusten egon dira. Ondoren elkartera salda hartzera, eta 14:30ean bazkaria izan dute kiroldegian. 140 lagun inguru elkartu dira. Benidormerako bidaia Maria Luisa Etxebarriari egokitu zaio.
Arratsaldean, berriz, artzain txakurren txapelketa egin dute Salazango landetan, eta irabazleak izan dira Enrike Mendiguren orozkoarra eta Riki txakurra. Fernando Etxebarria aramaioarrak ere hartu du parte, eta hirugarren izan da.