Erretiratuen Eguna ospatuko da bihar, zapatua, Aramaion. Aspalditik ohikoa denez, egitarau zabala prestatu du Udalak zapaturako.
Azoka, 14:30ak arte
Herriko produktuen azoka 10:00etatik 14:30era jarriko dute Nardeaga kalean; barazkiak, fruituak eta artisauen lanak izango dira bertan. Antolatzaileek emandako datuen arabera, 40 bat postu jarriko dituzte bihar. Eguerdian, 12:00etan, herriko hainbat taldek lagundutako meza izango da San Martin elizan eta ondoren Papargorri abesbatzak emanaldia egingo du; 13:00etarako herriko dantzari eta trikitilarien saioa iragarrita dago.
130 lagun bazkarian
Erretiratuen bazkaria, aurten ere, kiroldegian egingo dute, 14:30ean. Txartelak 8 eurotan salgai izan dituzte azken egunotan eta erantzun ona izan du deialdiak: 130 lagun inguru batuko dira bihar. Bazkalostean, erretiratu nagusiei omenaldia egingo zaie eta sarien zozketa izango da. Tartean, bi lagunendako Benidormera bidaia zozketatuko dute herri bazkarian batutakoen artean.
Artzain-txakur txapelketa
Arratsaldean, artzain-txakurren txapelketa jokatuko da Salasan baserri ondoko zelaietan, 17:30ean hasita. Aramaioko Fernando Etxebarriarekin batera, Jon Zuazo (Nafarate), Jose Mari Jauregi (Ilarduia), Txuxti Larrazabal (Laudio) eta Enrique Mendiguren (Orozko) izango dira lehian. Artzainen aginduetara hainbat ariketa egin behar izango dituzte txakurrek.