Horrela emango diote hasiera, beraz, bailarako sagardo denboraldiari. Irekiera txotxa 19:30ean egingo dute eta giro polita izango da Iturrieta sagardotegian. Izan ere, denboraldiari hasiera emateko trikitilariak, bertsolariak eta txalaparta joleak gonbidatu dituzte. 21:30ean, gero, afaria egongo da sagardoa eta txakolinarekin. Bada, sagardoarekin batera, aurtengo txakolina dastatzeko aukera ere izango da.
Adituek diote aurtengo sagardoa kalitate onekoa dela tenperaturak eta eguraldia nahiko onak izan direlako. Sagarra oso baldintza onetan etorri dela azaldu dute: freskoa, ustelik gabekoa eta garbia. Dena dela, aurten sagar gutxi jaso dutela ere esan dute sagardo ekoizleek, udako tenperaturak freskoak izan zirelako. Etorri den apur hori, baina, arbolan denbora asko pasatakoa eta heldua dela azaldu dute.
Aurtengo sagardoaren kolorea eta gorputza ezagutzeko, baina, sagardotegira gerturatzea izango da onena.