Aurten gainera izango da nobedaderik eta sorpresarik. Goizeko hamabietan egingo den meza bereziarekin hasiko dute erretiratuek bere eguna. Meza ostean herriko dantzarien txanda etorriko da, giroa berotu eta festari hasiera emateko. Urtero moduan, aurten ere azoka egingo dute Aramaion eta bertako produktuei protagonismo berezia eman nahi izan die aurten Udalak. Dena dela, kanpotik iritsitako postuak ere egongo dira. Beraz, barazkiak, eztia, sagardoa, eztia... denetik dastatzeko aukera izango da. Horrez gain, larrua lantzen duen artisau bat ere izango da azokan ogibide horren xehetasun guztiak erakusteko.
Aurten, nobedade, bezala animaliak ekarriko dituzte azokara. Hamarretakoa egiteko aukera ere izango dute erretiratuek. Herriko elkarte desberdinek salda eta txorizoa eskainiko dituzte goiz guztian zehar. Eguerdian, gero, urteroko herri bazkaria egingo dute herriko kiroldegian.
Herri bazkariaren ostean, festa giroarekin jarraitzeko erromeria egingo da trikiti doinuekin, erretiratuak dantza egitera animatu daitezen. Bien bitartean, gainera, opariak zozketatuko dituzte bazkarian parte hartutako guztien artean.