Aramaioko euskara elkartearekin batera, Euskara Añanan Mingainean (Añanako koadrila), Goierriko Euskal Eskola (Lazkao) eta Gutxisolo (Trebiñu) dira Topaguneko kide berriak. Zarauzko Txaparro eta Oñatiko Laixan elkarteen bajen ondorioz, guztira 95 elkartek osatzen dute Topagunea gaur egun.
Aramaioko Txirritola euskara elkartea 1998an sortu zuten. Xabier Herrarte da elkarteko presidentea egun. 100 bazkide inguru dira eta, besteak beste, Sagardo Eguna, Gabonetako menua, Txirritolinpiadak eta ipuin lehiaketa antolatzen dituzte urtean zehar. Hain zuzen, ipuin lehiaketako sari banaketa egin zuten aurreko egubakoitzean. Hiru aste barru, maiatzaren 20an, batzar orokorra egingo dute. Kultura etxean egin dute hitzordua egun horretarako, 18:30ean. Bazkide guztiei batzarrean parte hartzeko dei egin diete.