Aramaioko Sagardogileen Elkarteko kideak ilusioz beteta aurkitu ditugu lanean. Urtero moduan, hasi dira batutako sagarren zukua ateratzen. Aurten, baina, aurreko urteetan baino dezente samurrago egiten dihardute lan hori. Sagardoa ekoizteko makina berriak ekarri dituzte-eta. Hiru makina erosi dituzte; matxakadorea, prentsa eta zukuak pasteurizatzeko makina. "Lehen, egunetan egiten genuen lana, orain, ordu gutxi batzuetan egiten dugu eta neke askoz gutxiagorekin, gainera" azaldu du Juan Antonio Aretxaga Sagardozaleen Elkarteko kideak. Sagarren zukua aterata, baserritar bakoitzak bere baserrian egingo du hartzidura prozesua. Oraindik ez dira sagardoa egiten hasi, orain arte ateratako zukua zuku pasteurizatuak egiteko erabili dute. Aste batzuk barru hasiko dira sagardoa kupeletan sartzen.
Diru laguntzak
Makinak euren poltsikotik ordaindu behar izan dituzte. Eusko Jaurlaritzatik diru laguntzak emango dizkiela esan diete, baina kopurua ez dute zehaztu. Diputaziotik, berriz, ezezkoa jaso dute. Dena dela, Aldunditik diru laguntzak jasotzeko borrokan jarraituko dutela azaldu du Aretxagak.
Asmo handiko proiektua
Makina berriak, baina, asmo handiko proiektu baten hasiera besterik ez dira. Egun Udalak utzitako lokal batean dihardute lanean. Etorkizunean toki handiago bat lortu nahi dute eta makina gehiago erosi produktu gehiago ekoizteko. Gainera museo moduko bat egitea litzateke asmoa, lokal berriaren ondoan barietate guztietako sagarrak landatuta.