Sabin Salaberrik azaldu zuen badakiela saria Gasteizen jasoz gero, jende gehiago hurbilduko zela ekitaldira, baina Aramaio asko maite duela-eta bere sorterrian jasoko du, azkenean, Lekuona saria.
Eusko Ikaskuntza da ekitaldi guztia antolatuko duena, Udalak, baina, eraikina ipiniko du. Ekitaldia kultura etxean egitea erabaki dute, pleno aretoa txiki gelditu daitekeela uste dute-eta. Udaleko Kultura sailetik azaldu dute oraindik egitaraua zehazteke dagoela, baina saria eguerdi inguruan emango diotela, meza ostean. Aramaioko Bixente Goikoetxea Abesbatzakoak, bestetik, Sabin Salaberriren kantuak entseatzen dabiltza azken asteotan. Udalak opari berezia egin nahi zion organo-jotzaileari, eta saria ematerako orduan, abesbatzakoek Salaberriaren abestiak kantatuko dituzte.
Udaletik ez dakite nor etorriko den ekitaldira, baina badakite Eusko Jaurlaritzako zenbait ordezkari izango direla bertan. Lehendakariak ere banatu izan du Manuel Lekuona saria, baina oraindik ez dago jakiterik Ibarretxe Aramaiora etorriko den ala ez. Aramaioko Udalak oso pozik hartu du Sabin Salaberriren erabakia.