Hiru neska eta bi mutilek osatzen dute Sweet Rockers taldea. Hiru neskak aramaioarrak dira, eta bi mutilak, bat aretxabaletarra eta bestea arrasatearra: Bea Asurmendi (ahotsa eta gitarra), Iraia Beitia (gitarra), Eider Balanzategi (gitarra), Aser Errasti (bateria) eta Aitor Urrutia (baxua). Aspaldi honetan gazte asko dira musika instrumentuak jotzen dituztenak eta musika zaletasuna daukatenak, baina, ez da horren erraza taula gainean horrelako lan dotorea egiten duten taldeak aurkitzea.
Ingelesez abesten dituzte kantu gehienak eta, besteak beste, The Who, AC/DC, The Clash eta Guns and Roses taldeen bertsioak egiten dituzte; guztiak ere ukitu bereziarekin. Izan ere, taldearen ezaugarri nabarmenena da abeslariak era askotako erregistroetara moldatzeko duen erraztasuna eta ahots gaitasun handia duela. Orain arte, bertsioak egiten jardun duten arren, azken hilabeteotan kantu propioak lantzen hasi dira eta laster eroango dituzte abestiok taula gainera.
Taldean bi mutil dituzten arren, neskak dira gehiengoa. Hori da euren beste berezitasunetako bat, ez baita erraza rock talde batean hiru neska aurkitzea. Azaldu digute behin baino gehiagotan neska talde bezala aurkeztu dituztela. Horrelakoak entzutera ohituta daudela azaldu digu Bea abeslariak: "Normala dela uste dut, izan ere, taula gainera igotzen garenean, lehenengo, hiru neskok ikusten gaituzte, bateria eta baxua atzerago egoten dira-eta beti. Bestetik, ez da oso ohikoa horrelako talde batean hiru neska egotea. Mutilak ohituta daude horrelakoetara eta barre egiten dute".
Esan bezala, taldea sortu berria da eta oraindik ez dute kontzertu asko emateko aukerarik izan. Dena dela pozik daude jasotako kritikarekin: "Oso pozik gaude, azkeneko kontzertuan ere jende askok esan zigun gu berriz taula gainean ikusteko gogoz zeudela, eta hori oso pozgarria da". Apirilaren hamaikan emango dute hurrengo kontzertua, Aretxabaletako Haizea tabernan. Udan ere kontzertuz kontzertu aritzeko prest daudela azaldu dute.