Madrilgo San Pablo CEU unibertsitateko ikasleak ziren bisitariak, Arkitekturako laugarren mailakoak. Hirigintzaren gaineko teoria eta lurzoruaren legeak ezagutzen ari dira eta ikasitakoak praktikara eramateko, proiektu bat egin behar dute. Aramaion kokatuko dute, eskolak Arabarrirekin –Arabako Diputazioaren sozietate publikoa– duen hitzarmenaren bitartez.
Egitarau oparoa zeukaten eta osorik bete ahal izan zuten. Ibarra, Barajuen, Etxaguen eta Olaetan egin zituzten geldialdiak. Herri gunearen eta auzoen egiturak, bertako baserrien tipologia edota AHTren lanak ezagutu zituzten; eta udal ordezkariek Aramaioko Plan Orokorra aurkeztu eta euren herria baserritik bizi izan dela kontatu zieten, besteak beste.
Ondorioak, urtarrilerako
Behin herrian bertan izanda, ikasleek datuak biltzen jarraituko dute datozen asteetan eta, lau hilabete barru, bueltan etorriko dira, etorkizunerako nolako Aramaio diseinatu duten erakustera Udalari. Egiten ari diren lana interesgarria dela azaldu digu Asier Agirrek eta lagungarri izango zaiela, gaineratu: "Kanpotik datozenen ikuspegia ezagutzea ondo dator, beti".
Ikasleek Aramaiori buruz zer kontatu diguten bihar, urriak 5, argitaratuko dugun Asteleheneko Goienkarian irakurri ahal izango da.