Gazte Asanbladak antolatutako triki poteoarekin hasiko dituzte Ihauteriak zapatuan Aramaion. Goizeko hamabietan izango da hori. Ondoren bazkaria egingo dute herriko eskolak eguerdiko ordu biak inguruan. Arratsaldean gero Udalak antolatutako mozorro lehiaketarekin jarraituko du festak.
Parte-hartzaileek kalejira egin beharko dute kiroldegian hasi eta Herriko Plazaraino. Arratsaldeko bost eta erdietan hasiko da kalejira.
Guztira sei sari banatuko dituzte. Taldekako mozorro onenaren sarian haurren eta helduen taldeak bereiziko dituzte. Bietan ere, lehenengo postuan gelditzen direnek 90 euro jasoko dituzte sari gisa eta bigarrenek, berriz, 36 euro. Mozorro orijinalena ere sarituko du. Hori taldekakoa edo banakoa izan daiteke. Kategoria horretan lehenengo saria 48 euro izango da eta bigarrena 30 euro.
Mozorrotuen kalejira Herriko Plazara iristen denean, sari banaketarekin batera txokolatea edateko aukera izango da. Ondoren, giroa berotuta, disko jaia egingo dute.
Aratusteetako martitzena
Martitzenean ere mozorroak izango dira protagonista Aramaion. Kasu horretan, Aramaioko kaleak txinatarrez beteko dira, San Martin eskolako haurrak aurten txinatar jantziko dira-eta. Ordu biak inguruan herensuge artean kalejira egingo dute eskolatik Herriko Plazara. Bertan, azken asteotan entseatu dituzten txinatar dantzak egingo dituzte.