Aramaiko Masusta haurreskolan 6 haur daude gaur egun eta guztiak gela bakar batean bildu dituzte. Gaztetxoenak 8 hilabete dauzka eta nagusienak 2 urte.
Aramaioko haurreskola 07:30etik 17:00etara dago zabalik, baina, haur bakoitza zortzi orduz egon daiteke gehienez bertan. Bi hezitzailek egiten dute lan Aramaioko Masusta haurreskolan: Aitziber Aginagalde eta Ursuia Etxebarria.
Goizeko lehenengo orduan, haurrak iristen direnean, "alfonbra momentua" edo "asanblada" egiten dute. "Nor etorri den eta nor falta den ikusten dugu haurrekin. Gero, abestiak kantatu edo ipuin bat kontatzen diegu" azaldu du Aitziber Aginagaldek. 10:00ak inguruan lo-kuluxka egiten dute hala nahi dute haurrek, eta 12:00etan jangelara joaten dira bazkaltzera. Bazkalostean siesta egiten dute eta arratsaldean jolas libreak. "Aramaioren kasuan oso ume gutxi ditugu eta hori ere puntu positiboa da. Haurren zaintza oso pertsonalizatua da" dio Aginagaldek.