EAJk ekimenaren kontra bozkatu zuen, eta Eusko Alkartasunak baiezkoa eman zuen. Asier Agirre alkateak azaldu digunez, oraindik zehazteke dago inkesta horrek izango duen formatua edo egingo dituzten galderak.
Horrez gain, AHTren desjabetze espedienteei egindako alegazioen berri eman zuten osoko bilkuran. Izan ere, Udalak enpresa bat jarri zuen herritarren eskura alegazioak idazten laguntzeko. Herriaren alegazioak zein partikularrenak jaso dituztela azaldu digu Asier Agirre alkateak.
Kiroldegia eta ur zerbitzua
Osoko bilkuran, bestetik, bi plegu atera zituzten: kiroldegia, batetik, eta mezularitza eta ur saneamendu zerbitzuak, bestetik, kudeatzeko.
Herriko kiroldegiaren ardura hartuko duen enpresa berriak 11 hilabeterako kontratua sinatuko du, instalazioen zaintza eta erabileraz arduratuko da eta 26.474 euro jasoko ditu. Mezularitza eta ur saneamenduaren kasuan, 19.758 euro izango ditu ardura hori hartuko duen enpresak. Zerbitzuen gaia izan zen, hain zuzen ere, osoko bilkuran eztabaida handien sortu zuena, Udalbatza berriak uste baitu azken urteetan zerbitzu gaiak ez direla behar bezala zaindu.