Goi-tentsioko linearen inguruko informazioa emateko bilera, eguenean

Espainiako Ingurumen Ministerioak Aramaio zeharkatuko duen goi-tentsioko linea elektrikoa eraiki nahi du. Frantziatik datorren sare elektrikoa Espainiarekin lotzea da linea horren helburua eta Galiziaraino iritsiko litzateke. Ibilbide hori egiteko bi aukera planteatzen ditu Ministerioak bidalitako aurreproiektuak; bata Aramaiotik igarotzen dena Oñati, Arrasate eta Eskoriatzatik ere pasatuz, eta bestea Bergaratik joango litzatekeena.

Aramaiotik pasatuz gero honako ibilbidea egingo luke: Untzilla, Zabola, Durakogain, San Kristobal, Arangioko bidegurutzea eta Oleta. Untzillaren parean, baina, bi aukera jasotzen ditu aurreproiektuak; bata Murugainetik joango litzateke eta bestea, berriz, Suñako etxeetatik.


Aramaioko Udal Gobernuak uste du proiektua zorakeria bat dela eta sekulako kaltea eragingo lukeela herrian. Hori horrela, alegazioak aurkeztuko dizkiote. Asier Agirre alkateak azaldu du Arabako Foru Aldundiarekin ere harremanetan ipini direla eta Diputazioak ere alegazioak aurkeztuko dituela bere aldetik.

Bilera irekia

Proiektu honek herrian izan dezakeen eragina kontuan izanda bilera irekia egingo du Udalak Ministerioaren proiektua herritarrei azaltzeko. Datorren eguenerako, ekainak 4, egin dute deialdia, 19:00etan udaletxean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.