Dagoeneko hasi dira lanak egiten; izan ere, abenduaren 31 baino lehenago lanok bukatuta egon beharko dute.
Udalak jasotzen dituen tasak
"Guk esan genuen ganaduzaleengandik jasotzen genituen tasak sektorean inbertituko genituela berriro", azaldu du Asier Agirre alkateak. Udalak urtean tasa kantitate bat jasotzen du, gutxi gora behera, 6 mila euro. "Diputazioaren aldetik diru laguntza bat jaso dugu, 20 bat mila eurokoa. Hortaz, udalaren dirua eta diputaziotik jasotako dirua inbertituko dugu lehenengo sektorean", esan du alkateak.
Inbertsioak mendi publikoetan
Inbertsioak non egin erabaki dute dagoeneko. Aramaion lau mendi publiko daude: Murugain, Tellamendi, Arangio eta Durakogain. Inbertsioak lau mendi horietan egingo dituzte. Besteak beste, jarriko dituzte ganaduak ura edateko askak; ganadua txertatzerakoan, ganadua harrapatzeko kaiolak; eta konponduko dira langa kanadarrak, eta baita itxitura batzuk ere.
Bi helburu
Inbertsio hauen helburua bikoitza dela azpimarratu du alkateak. Alde batetik, ganaduzaleengandik jasotzen dituzten tasak sektore berdinean sartzea da helburua; eta, bestetik, ganaduzaleei ahotsa ematea. "Ganaduzaleena herriko sektore garrantzitsua da, eta mendiak garbi mantendu gura baldin baditugu, zaindu egin behar ditugu", azaldu du Agirrek.