Errekara kutsatutako lurrak bota dituztela salatu du Aramaio Zainduzek

Aramaio Zainduz elkarteak Abiadura Handiko Trenaren lanak salatu zituen pasa zen astean Uraren Euskal Agentziaren aurrean. Salaketa horren bitartez jakinarazi zuten trenaren lanekin Bolinburu errekatxoa hondatu egin dutela. Bada, orain, salaketa hori zabaldu egin dute. Aramaio Zainduz elkartekoek diote Bolinburu erreka kutsatutako lurrekin estaltzen dihardutela.

Izan ere errekaren inguruan trenak gelditu, aurreratu  eta aldatzeko plataforma bat eraikiko dute. Horretarako ingurua lurrez bete behar dute. Aramaio Zainduz elkarteko kideek diote lur betetze hori zabortegi batetik hartutako lur kutsatuekin egiten dihardutela. Gaineratu dute Bolinburu errekan karramarroak daudela eta horiek, kutsaduraren ondorioz, desagertu egingo direla.

Informazio falta

Beste behin ere Abiadura Handiko Trenaren gaineko informazio falta salatu du Aramaio Zainduzek: " Egun batetik bestera gure ingurua kutsatutako lurrez beteta aurkitu dugu; ezer jakin barik. Kristalak, plastikoak, lixiba botilak, pilak, egurra... denetarik bota dute errekara". Aramaio Zainduzekok uste dute Aramaioko zabortegi zaharretik hartu dutela aipatutako lur kutsatua.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.