Ikasturtean zehar egiten duten ekintza bat gehiago da aste kulturala, ohitura bihurtu da Aramaioko herri eskolan. Aurreko urteetan antzinako sukaldea, artzaintza edota egurraren ingurukoak jorratu dituzte, eta aurten 'Aramaio, lehen, orain eta gero' gai monografikoa lantzen dihardute. Musikariak, lanbideak, eraikinak eta jokoak aztertu dituzte zikloka, eta guztien artean erakusketa osatu dute. Behin hori eginda, ikaskideek egindako lana ezagutzeko garaia da orain.
Gurasoen eta aiton-amonen laguntza ezinbestekoa izan dute neska-mutikoek, garai bateko kontuak ezagutzeko.
Erakusketa
Gurasoek izango dute aukera euren seme-alabek egindako lana ezagutzeko, bihar, eguena, 16:00etatik 18:00etara, hain zuzen. Erakusketa ekintzetako bat da, ordea, gehiago ere badirelako: atzo, Floren Unzuetaren organo kontzertua izan zuten, eta bihar ogia lantzeko saioa egingo dute.