Modu horretan, Ibarrako etxebizitza guztiak (400) berotzea lortuko litzateke eta baita Udal eraikinak ere: Sastiña, udaletxea, hiltegi zaharra, anbulatorioa, haur eskola, eskola, kultura etxea, kiroldegia eta hilabete batzuk barru eraikitzen hasiko diren eguneko zentroa eta musika etxea.
Udalak sarearen azpiegitura egingo luke herri guztirako. Baina partikularrek gero, eurak ordaindu beharko dituzte sare horretara konektatzeko egin beharreko lanak.
Proiektuaren aurrekontua 2.800.000 euro da. Baina, aurreproiektu bat besterik ez da. Udala aurreproiektua aurrera eraman ahal izateko diru-laguntza bila dabil orain. Eusko Jaurlaritzaren Erein proiektuaren bitartez aurrekontuaren %40a ordaintzeko diru-laguntza jasotzea espero dute, baina, erantzunaren zain daude oraindik ere.
Alkateak azaldu du asmo handiko proiektua dela: "Energia berriztagarriak erabiltzeaz gain, energia hori lortzeko erregaia bertan lortuko genuke eta lehenengo sektoreari bultzada emateko modua izan daiteke".