Eguneko zentroa atzeratu egingo dela dio Udalak

Uztailaren hasiera aldera Arabako Diputazioak iragarri zuen Aramaioko Udalarekin hitzarmena sinatuko zuela bertan eguneko zentroa egiteko. Proiektu horretarako aurreikusitako aurrekontua 150.000 euro zirela azaldu zuten prentsa ohar baten bidez. Aramaioko Udala aspalditik zebilen Diputazioarekin negoziazioak egiten herrian eguneko zentroa eraikitzeko eta Aldundiak hitzarmenaren berri eman zuenerako Udalak ordurako landuta zeukan eguneko zentroaren proiektua. Hasiera batean, hitzarmena uztail amaieran sinatzea erabaki zen eta Udalaren asmoa zen urtea amaitu aurretik lanak hastea. Kontua da urtea amaitzear dagoela eta hitzarmena sinatzeke dagoela oraindik.

"Guk etxeko lanak eginda ditugu, eguneko zentroa eraikitzeko diru partida gordeta daukagu, lokala badaukagu eta proiektua ere landuta dago. Diputazioaren dirulaguntza jasotzeko zain gaude lanak hasteko", argitu du Asier Agirre alkateak. Agirre arduratuta azaldu da: "Proiektu garrantzitsua da, aramaioarrek urteak daramatzate eguneko zentroa eskatzen. Herritarrak, gainera, badabiltza galdezka eta izena ematera ere etorri da bat baino gehiago". Alkateak espero du Aldundiarekin hitzarmena lehenbailehen sinatzea.

Lugorri pasealekuan

Eguneko zentroa Lugorri pasealekuan egitea da Udalaren asmoa. 130 metro koadro inguru izango ditu. Zentroak gela nagusia,  sukaldea, biltegia, garbitegia eta erizaintza gela izango ditu. Bestalde, bi komun izango ditu: komun arrunta bat eta geriatrikoa bestea.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.