Helburuak
Uemaren helburu nagusia da herritarrek bizitza sozial eta politikoa euskaraz egiteko urratsak ematea. "Gure helburua da Uemako kide diren Udalerriek euskaraz bizi eta lan egin ahal izateko pausuak ematea" azaldu digu Aramaioko zinegotzi Martin Arriolabengoak. Udalerri euskaldunetan herritarrek egiten duten bizitza sozial guztia, publikoa zein pribatua, euskaraz izan dadin bideak urratu nahi dituzte. Modu horretara, udalerri euskaldun guztiek bat eginda, euskara nagusi izango den lur-gune bat osatzea litzateke beste helburuetako bat.1991n osatu zen Udalerri Euskaldunen Mankomunitatea. Estatuko abokatuak horren estatutuak errekurritu egin zituen eta 1995ean aldatu egin zituzten. Beti aldarrikatu izan dute, baina, bere funtzionamendua ez dela aldatu. Egun, Uema Jaurlaritzako Aholku Batzordeko kidea da eta udal euskaldunetan egin beharreko plangintzaren diseinuan ari da lanean.
Ipar Euskal Herrira zabaltzea da orain mankomunitatearen hurrengo helburuetako bat. Ipar Euskal Herriko udalerriak mankomunitatean egoteko aukera izan dezaten, egin beharreko aldaketa juridikoak aztertzen ari direla azaldu dute zuzendaritzatik.
Ekimen politikoa
Uemaren ekimen politikoa indartzea da zuzendaritza berriaren beste helburuetako bat. Lehendakaritza berriak uste du azken urteotan oharkabean pasatu dela Uemaren lana eta horri bultzada bat emateko ekimen politikoa berreskuratzea gura dute.EAJ-ren ordezkari barik
Lehendakaritza berria osatzeko egindako Batzar Nagusian EAJk ez zituen bere ordezkariak izendatu. Alderdi horretako hautetsiek alde egin zuten bileran etenaldia egin zutenean. Hala, EAJri dagozkion hiru karguak hutsik geratuko dira, momentuz. "Ez dugu ezer ulertzen, ez zen inolako arazorik egon, baina momentu batean eta azalpenik eman gabe utzi zuten bilera" azaldu du Martin Arriolabengoak.Hilabetean behin elkartuko dira Udalerri Euskaldunen Mankomunitateko kideak euren proiektuetan aurrera egiteko. Arriolabengoak aurreratu digu urtarrilean Uema Eguna ospatu nahi dutela.