Lurren desjabetzeen aktak egiteko udalerri horretako alkateak aktak sinatu behar ditu, desjabetzeen prozesua modu egokian egiten ari dela baieztatzeko. Asier Agirre Aramaioko alkateak uste du desjabetzeak ez direla kondizio onetan egiten ari, eta aktak lursailetan bertan sinatzea eskatu du. Horiek izan dira, beraz, alkateak aktak ez sinatzeko eman dituen arrazoiak.
Alkatearen ezezkoaren aurrean akten altxamendua bertan behera gelditu da bigarren aldiz. Delegaziotik jakinarazi dute hirugarren deialdia egingo dutela hilabete barru. Kasu horretan, gainera, alkateak ez du baieztapena sinatu beharrik edukiko eta Espainiako Gobernuko ordezkaria bera izango da akten altxamendua sinatuko duena.
AHT Gelditu Elkarlaneko kideek kontzentrazioa egin dute goizeko hamarretan Espainiako Gobernuko Ordezkaritzaren parean. Administrazioen jarrera inposatzailea izaten ari dela salatu dute. Momentu larrian aurkitzen garela adierazi dute eta gaineratu dute gutxi batzuen interesak babestearren beste guztien eskubideen gainetik salto egitea ez dela zilegia ezta ere onargarria. Ertzaintzak prentsaurrekoan izan diren hainbat pertsonari identifikazioa eskatu die.