Bularretik Mintzora proiektuaren helburu nagusia da 0 eta 6 urte bitarteko haurrengan irakurketa ohiturak sustatzea gurasoekin eta haien hezitzaileekin. Kanpainaren arduradunek adierazi dute irakurketa oso garrantzitsua dela haurraren garapenean eta "haurrari irakurtzen ematen diogunean haurraren garapen intelektuala, emozionala, soziala eta hizkuntzarena estimulatzen ditugula". Gaineratu dute haur txiki bati irakurtzen diogunean komunikazio afektibo bat sortzen dela bera eta bere helduen artean.
Formazioa
Orain arte aipatutako guztia lortzeko guraso eta irakasleak formatzea da Bularretik Mintzora kanpainaren helburua. Horretarako hitzaldiak eskainiko dituzte eta baita ikastaroak ere. Pello Añorga ipuin kontalari eta idazleak Helduentzat nola kontatu, irakurri, begiratu liburu bat izenburua duen ikastaroa eskainiko du; hitzaldiak urriaren 15, 22, 28 eta 29an izango dira, 18:00etan kultura etxean. Juan Karlos Alonso psikologoak, bestetik, hitzaldi bat eskainiko du azaroaren 3an haur literaturak hurraren garapenean duen eraginaren gainean. Horrez gain, Juan Kruz Igarabide poetak eta Itziar Zubizarreta irakasle eta narratzaileak ere emango dituzte hitzaldiak; bi jardunaldi horien datak zehazteke daude oraindik. Dena dela, antolatzaileek azaldu dute hitzaldien egunak eta orduak guraso eta irakasleekin batera adostuko direla eta posible dela aldaketak egotea.