Marka polita egin zuten herritarrek zapatuan jokatutako V. Kurtzeta-Gain Plater Tiroketa txapelketan: izan ere, bost aramaioar egon ziren saridunen artean.
Sari nagusiak honela banatu ziren: txapelduna Jose Ramon Arginzoniz elorriarra izan zen, eta 50 euro eta urdaiazpikoa jaso zituen; txapeldunordea Angel Mari Ullibarriarana aramaioarra izan zen, eta 40 euro eta urdaiazpikoa izan ziren beretako; hirugarren, Alfonso Corbeiro, eta laugarren, Gonzalo Olea. Lehenengo hamabostek urdaiazpiko bana jaso zuten. Txapelketa robot makina bitartez egin zuten, hamabost plateretara.
Oso txapelketa borrokatua izan zen, bukaerara arte; izan ere, lauk 15 platerak jo zituzten, eta berdinketa apurtzeko lehia ere oso bizia izan zen.