Goizeko 10:30ean ziren heltzekoak Sustapen ministerioko langileak Aramaioko udaletxera, baina, azkenean, 9:45ean heldu dira bertara. AHT egiteko lurren desjabetzeen sinatzea zen euren eginbeharra, baina gaurkoan hasieratik ekarri dituzte prestatuta sinadura hauek bertan behera uzteko dokumentuak.
Bertan behera uzteko akten sinadura udaletxe barruan egitea zen asmoa, baina ministerioko langileak ertzainekin sartu dira udaletxera, eta bertan bildutako jendeak orduan bidea moztu diete. Istiluak ekiditeko, udaletxe kanpoan sinatu dituzte azkenean dokumentuak.
Desjabetzeak
Aramaion, denera, 70 lursail desjabetuko dituzte eta 40 partikular. Udalari dagokionez, hainbat lursail eta bide desjabetuko dizkiote.
Protestak
Sustapen ministerioko langileen bisita dela eta, AHT gelditu elkarlaneko kideek bultzatuta hainbat ekimen burutu dituzte Aramaion. Hala, atzo iluntzean manifestazioa egin zuten, eta gaur goizean bertan hainbat kide eta herritar bildu dira udaletxe kanpoan eta barruan AHTren kontra protesta egiteko.
Ertzainen furgoneta bat egon da uneoro udaletxe inguruan, eta eurek babestuta sartu dira udaletxean Sustapen ministerioko langileak. Tentsio uneak egon diren arren, ez da aparteko istilurik egon manifestari eta ertzainen artean.
Gainerako sinadurak ere bertan behera
Sustapen ministeriotik jakinarazi digutenez, gaurkoaz gain, bihar, etzi eta datorren maiatzaren 13rako aurreikusita zeuden desjabetzeen akten sinadurak ere bertan behera geratu dira Aramaion. Gobernu ordezkaritzak zehaztuko du non eta zein egunetan sinatuko diren akta hauek.