Lehiaketa horren oinarriak www.cuadrillazuia.com webgunean aurki daitezke. Orri-markagailuen gaia librea da eta mota guztietako materialak erabili daitezke. Lanak folio edo kartoi mehean aurkeztuko dira eta 4,5x21 zentimetroko tamaina izan beharko dute. Lehiakide bakoitzak, gehienez, hiru lan aurkeztu ahal izango ditu.
Itxitako gutunazalean aurkeztuko dira, kanpoaldean 'III. Orri-markagailu lehiaketa -Zuiako koadrila' eta kategoria jarriz. Azken horren harira, aipatu beharra dago lau kategoria daudela: Alebinak, 10 urtera arte; umeak, 11 urtetik 14ra; gazteak, 15 urtetik 17ra; eta helduak, 18 urtetik aurrera. Gutunazal horretan beste gutunazal bat sartu beharko da bakoitzaren datu pertsonalekin.
Sariak
Lehiaketak hiru sari ditu. Irabazleak 150 euro lortuko ditu; bigarrenak, 100; eta hirugarrenak, 50. Irabazlearen izenak Zuiako koadrilako web gunean argitaratuko dira datorren urtarrilaren 12tik aurrera.
Saritutako lanak koadrilarenak izango dira. Gainontzekoak, berriz, koadrilako egoitzan berreskuratu ahal izango dira apirilaren 24a baino lehen.