Dena dela, auzoak argitzea ez da proiektu horren helburu bakarra; argindar kontsumoa jaistea da beste asmoa. Udalak uste du gaur egun argiteria publikoaren kontsumoa oso altua dela. "Gaur egun daukagun argiteria publikoak gastu energetiko handia dakar. Gainera, konturatu gara zenbait kasutan argi kutsadura ere eragiten duela", azaldu du Asier Agirre alkateak. Argi kutsadura sortzen da zenbait farolak behar baino argi gehiago ematen dutelako eta argi hori gorantz bidaltzen dutelako; ondorioz zerua argitzen dute zenbait izar desagertaraziz.
Hori horrela, proiektua garatzerako orduan argindar kontsumoa murrizteko bideak aztertzen dihardute. Oraingoz, erabaki dutena da kontsumo txikiko bonbillak ipintzea eta intentsitate bikoitzekoak. Horrek esan nahi du iluntzean ordu jakin batetik aurrera argi gutxiago emango dutela.
Lanak udarako hasi nahi dituzte eta honako tokietan ipiniko dituzte, oraingoz, bonbilla berriak: Azkoaga, Barajuen, Bolinburu, Zubieta, Untzilla eta Suñan. Lanok Eusko Jaurlaritzaren diru laguntzarekin egingo dituzte.
Hau, baina, proiektuaren lehenengo zatia besterik ez da. Udalaren asmoa da datorren urtean bigarren fasearekin hastea. Orduan falta diren auzoetako eta Ibarrako argiterian egingo dituzte aldaketak.