Eguaztenean, hilaren 14an, Aramaioko alkate Asier Agirre Gasteizen, Arabako Audientzia Probintzialean, epaitu egingo dute 2007ko irailean Aramaion AHTren gaineko herri galdeketa egin zelako.
Aramaioko udal gobernuko kideek azaldu zuten 2006ko azaroan 685 herritarrek eta Aramaioko hainbat elkartek Udalari eskatu ziotela AHTren gaineko herri kontsulta egitea. Baina Estatu Abokatuak bultzatuta, Arabako Audientzia Probintzialak herri kontsulta debekatu zuen. Gerora, 2007ko udal hauteskundeen ostean, herritarrek eskaera bera egin zuten eta urte hartako irailaren 28 eta 30 bitartean, galdeketa egin zuten. Herritarren %56k esku hartu zuen eta horietatik %98k AHTren kontra bozkatu zuen.
Horren ondorioz, Estatu Abokatutzak alkatearen kontra jo zuen eta haren kontrako epaiketa zabaldu zuten.
40 bat udalen atxikimendua
Aramaioko Udalean alkatearen aldeko mozioa eztabaidatu eta onartu egin zuten, EAJ eta EAren kontrako botoekin. Gerora, Hegoaldeko eta Iparraldeko 40 bat udaletan mozio bera eztabaidatu eta onartu dute, Asier Agirreri atxikimendua adieraziz. Udal horien ordezkari moduan, Aramaion egindako prentsaurrekoan Arrasateko eta Otxandioko alkateak diren Ino Galparsoro eta Haritz Otxandianok esku hartu zuten.
Otxandianok jakinarazi du ulertezina dela alkate bat herriari hitza emateagatik epaitzea; eta demokraziak parte-hartzailea behar duela izan.
Intentzionalitate politikoa
Galparosorok, bestalde, gaineratu du epaiketa horren atzean intentzionalitate politikoak daudela: "Ez da kasualitatea zer motatako galdeketa den eta alkateak zer tendentzia politikoa duen".
Bestalde, Arrasateko alkateak gogoratu zuen hainbat udaletako ordezkariek kontzentrazioa egingo dutela eguazten goizean Gasteizen, epaitegiaren aurrean.
Herritarren erantzuna
Horrez gain, Asier Agirrek berak eskertu gura izan ditu atxikimendu mezuak eta baita herritarren aldetik jaso duen babesa: "Herriak ulertu du herria bera dagoela epaituta, eurek galdeketa eskatu eta eurek parte hartu zutelako".
Hala ere, gaineratu zuen Estatuko fiskalak bere kontra jokatu duela, orain arte AHTren gainean egin diren galdeketen emaitzak oso esanguratsuak izan direlako, eta alkateetako bat zigortuz, galdeketak moztu gura dituztelako.
Are gehiago, Aramaioko herritarrek kontzentrazioa deitu dute biharko, domeka, kultura etxe alboan, 13:30ean.