Puntuz puntukako uhinezko sistema ipini dute martxan. Udaletxean, kanposantuan, Azkoagan, Untzillan eta Geianon sare hori osatzen duten antenak ipini dituzte. Antena horiek sortzen duten kutsadura magnetikoa, baina, oso baxua da. Metro bateko distantziara mugikor batek sortu dezakeen kutsadura baino baxuagoa. Antena horiek dauden etxoletan, gainera, kamerak jarri dituzte. "Oso puntu delikatuak dira eta horietan informazioa manipulatuz gero kaltea handia izan daiteke" azaldu du Javier Arriolabengoa udaletxeko teknikariak.Udaletxean daukaten ordenagailu batetik ikusten dituzte irudiok, eta kalitatea ere bertatik neurtzen dute. Etorkizunean helburua da herritarrek Udalaren webgunean euren kontsumoa eta kalitatea ikusi ahal izatea.
Oraingoz uhin bidezko sare horretan argindarraren kalitatearen inguruko informazioa bakarrik jasotzen dute. Baina sistema honek aukera gehiago ematen ditu, etorkizunean oso interesgarriak izango direnak. "Udaletxearendako oso erabilgarria izan daiteke. Sare horretan informazio mota asko sartu daiteke. Esaterako, udalak bere deialdien berri eman ahal izango du etxez etxe sistema honi esker. Telebista kate bat sortuko litzateke, eta hor deialdiak ikusteko aukera izango luke erabiltzaileak pasahitz bat sartuta" adierazi du Arriolabengoak.
Aramaio argindarraren kalitatea neurtzeko uhin bidezko sistema bat daukan Arabako lehenengo herria da.