Goi mailako kirolaren munduan egin duen bezalaxe, oraingoan ere, gizonezkoak nagusi diren munduan bere tokia lortu du eta bere izena hizki handiz idatzi. Honen atzean bere betiko aldarrikapena: "Lana eginez gero eta gogor saiatuz gero, emakumeok ere lortu ditzakegu sariak".
Aramaioarrek eskerrak eman nahi izan dizkiote Undari Aramaioko izena mundu guztian zehar zabaldu izanagatik eta zorionak eman lortutako guztiagatik.
Sastiña ermitan ekitaldi xumea baina hunkigarria egin dute gaur. Aramaioko azken seme kutunak, Patxi Uribarrenek, izendatu du Unda alaba kutun; Uribarrenek borrokalariaren nortasuna eta indarra azpimarratu ditu. Asier Agirrek, berriz, euskal makila eman dio oroigarri moduan. Ekitaldia Aramaioko beste seme kutun baten emanaldiarekin amaitu da: Bixente Goikoetxea abesbatzaren kantuekin.
Sastiñaren inaugurazioa
Gaurko ekitaldiarekin Sastiña ermitaren aurpegi berri ezagutu ahal izan dugu. Konponketak egiteko urtebete pasatxoan itxita egon ostean, dotore geratu da. Udalak kulturaren elkargune bilakatu nahi du ermita. Sastiñara hurbiltzen direnek Emakume kirolariak izeneko erakusketaz gozatzeko aukera izango dute.