Papargorriko emanaldiak harrera oso ona; eta Anger, Never Surrender eta Goseren kontzertuek arrakasta erdietsi zuten, adin eta jatorri askotako jendetzak bete zuen-eta txosnagunea.
Zapatua, umeekin hasi
Biharamuna bixamonarekin hasi zuten herritarrek eta umeek hartu zieten aurrea. Tortilla txapelketa Sara eta Jati gaztetxoek irabazi zuten. Ordu berean, Kulkik ekarritako jolas tradizionalekin ume mordo batek jolastu zuten, euri tantei ere bizkarra emanez.
Karta jokoei dagokienez, musean Jabier Uribarren eta Benito Abarrategi txapeldun; eta briskan Mari Arriaran eta Matilde Unda. Eguna bukatzeko, Txirritolinpiada jendetsuak eta Bentazaharreko mutiko alaien kantutegi parte-hartzailea.
Domeka harri-zulatzaileen ikuskizunak eta Leintzeko bertsolari eta saltseroen Gaur Yogur ikuskizunak itxi zuten.
Gaur, mozorroen eguna da eta herri afariko txartel guztiak salduta daude. "Mozorrotu barik ez etorri", diozkue, "nabarmen geldituko zarete-eta".
Oztopoak oztopo, jende asko hurbildu da
Domeka iluntzean Udaleko Kultura zinegotzi Ainara Inunziagarekin izan ginen balorazioa jasotzeko. Inunziagak nabarmendu zuen: "Bidea itxita 155 egun daramagun arren, uste baino jende gehiago etorri da gurera". Horrez gain, azpimarratu zuen eguraldiak tarteka kalte egin badie ere, jendeak asko parte hartu duela jaietan. Ekintza arrakastatsuenen artean, barikuko rock kontzertuak, Bentazaharreko Mutiko Alaien emanaldia, Txirritolinpiadak eta kalejirak nabarmendu ditu zinegotziak.
