Aramaioko alkateak 9 urteko inhabilitazio edo gaitasungabetzeari eta 1.800 euroko zigor eskariari egin beharko dio aurre epaiketan 2007ko irailean AHTren kontrako herri galdeketa egitea ahalbideratzeagatik.
Herri ekimeneko kideek azaldu dutenez, fiskalak alkatearen aurka duen froga nagusia da galdeketa egin zen egunetako baten udaletxeko ateak ireki izana. Horren aurrean salatu dute epaitzeko arrazoi bakarra herritarren iritziari bidea ematea dela, eta aldarrikatu dute herritarren iritzia jakitea ez dela delitua.
Epaiketaren bezperarako, otsailaren 9rako, elkarretaratzea deitu dute herriko plazan 19:00etan eta bertan parte hartzeko deia egin diete herriko kultur elkarte, talde, norbanako eta erakundeei.
Zehaztu dute era berean herri ekimena ez dela AHTren aldeko edo kontrako ekimena, prozeduraren injustizia salatzeko ekimena baizik.
Debagoieneko udalen babesa
Herri ekimen honetaz gain, Arrasate eta Elgetan kenduta, Debagoieneko gainerako udal guztietan epaiketa honen kontrako mozioak onartu dituzte. Arrasaten gaur egingo duten osoko bilkuran eztabaidatuko dute mozioa.