Guztira zapatu goizeko ferian 45 bat postu ipini zituzten, horietatik 14 Aramaioko herritarrek; aramaioarrek ortuko produktu ekologikoak, eztia, perretxiko postuak eta artisau eran egindako bitxiak ipini zituzten, besteak beste. Halakoetan ohikoa den moduan, giroa alaitzeko trikitilariak, txistulari zein dantzariak aritu ziren kaleetan.
Adin eta gustu guztietako jendeak hartu zuen parte jaian, baina, ezin ahaztu, jai egun horretako protagonistak: jubilatuak, alegia. Horiek bazkaria egin zuten feriaren ostean eta ondoren, urtero moduan, Benidormera bidaia bat zozketatu zuten erretiratuen artean. Hori, Aratz Aranak irabazi zuen.
Udala sindikatuekin bat
Duela hiru urte ekin zioten Aramaioko jubilatuen egunean ganadu postuak ipintzeari; aurten, baina, udalak bat egin du UAGA etaSergal-en eskaerarekin eta hori horrela, ez da animaliarik egon azokan.