Galdeketa, gainera, ez da Aramaioko tramuari buruz bakarrik izango. "Gauza ez da jendeak AHTk Aramaion bertan izango duen inpaktuaz bozkatzea; hau da, AHTren proiektua osotasunean hartuta eman beharko dute herritarrek iritzia. Ez du balio esateak, adibidez, AHT Aramaiorako ez, baina Euskal Herrirako bai", azaldu du Asier Agirre alkateak.
Datorren egubakoitzean, irailaren 28an, hautestontzi bat jarriko dute udaletxean, asteburuan bozkatu ezin dutenentzat. Zapatuan, gero, auzo alkateak aukeratzeko auzoetan egingo diren hauteskundeak aprobetxatuz, beste hautestontzi bat jarriko dute inkestari erantzun ahal izateko. Domekan ere, udaletxean botoa emateko aukera izango dute aramaioarrek. Gogoratu inkestan parte hartu ahal izateko ezinbestekoa dela Aramaion erroldatuta egotea.
Galdera bakarra izango da: jendeak proiektuaren alde edo kontra dagoen erantzun beharko du.