80 familia baino gehiago herri eskolako festan

"Parranda" egin zuten Aramaioko San Martin Herri Eskolako haur eta gurasoek zapatuan: ikasturte amaierako festan murgilduta ibili ziren arratsaldetik gauerdira arte. Pozik kontatu zizkiguten atzo bezperako kontuak primeran pasa zutelako, eguraldiak lagundu zuelako eta parte-hartze handia izan zelako –85 familia inguru batu ziren–.

Gurasoek antolatutako tailerrekin hasi zuten festa: graffiti tailerrean, paisaia erraldoi bat margotu zuten horma baten; ponpa erraldoiak egiten ikasi zuten; koloretako aho-zapiekin egindako bolekin koloretako lore handi bat osatu zuten, collage moduan; arroza, alpiste eta globoekin egindako pilotekin malabareak egin zituzten; eta makillaje tailerrean, apain-apain jarri ziren. Tailerrekin bukatutakoan, guztiek parte hartzeko moduko jokoak egin zituzten, argazkiko aulki-jokoa, esaterako. 

Afari-merienda eta erromeria

Ikastetxeko jangelan afari-merienda egin zuten gero, herri bertako sagardo, sagar-zuku eta ogiarekin, eta familia bakoitzak etxetik eramandako jakiekin. Gurasoetako batek DJ lanak egin zituen eta, hala, punta-puntako erromeria izan zuten.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.