Goizean goiz ez zen jende asko ibili azokan, baina meza ostean kalea bete-bete egin zen. Barazkiak, frutak, eztia, gazta, taloa, landutako egurra, ogia... denetik egon zen Aramaioko azokan 10:00etan hasi eta 14:30ak arte. Saltoki gehienak herrikoak ziren arren, bazeuden Gasteiz, Bilbo eta Eibarretik etorri zirenak ere. Nekazaritza ekologikoko bi postu ere jarri zituzten aramaioarrek.
Gainera, herriko hainbat taldek egun hau aprobetxatu zuten postuak jartzeko. Gazte Asanbladakoek taloak egin zituzten, AHTren aurkako taldeak sinadurak bildu zituen eta San Martin Ikastolakoek GKEentzat batu zuten dirua eurek egindako gozoekin. AEKk eta Araba Euskarazkoek ere jarri zituzten saltokiak.
Erretiratuen Eguna
12:00etan mezatara joateko elkartu ziren herriko erretiratuak. Meza eta gero, Aramaioko Lagun Artean dantza taldekoek saioa egin zuten eliza parean. Jende ugari batu zen ekitaldira eta taldeko gaztetxoenek euskal dantzak badakizkitela argi utzi zieten bertaratuei.
14:30etan pilotalekuan egin zuten bazkaria erretiratuek. Bakailaoa jan eta gero, dantzaldia izan zuten. 150 bat lagun batu ziren jaira eta hainbat opari ere zozketatu zituzten. Herriko nagusienak ere omendu zituzten.