Herriko pertsona nagusien omenezko eguna izateaz gainera, etxeko edo baserriko produktuen azoka eguna ere bada Erretiratuen Eguna. Hain justu ere, azoka horretan, bereziki, herritarrek parte har dezaten gura du Udalak, herriko produktuak bultzatze aldera. Eta dei egin die horretarako. Jakitera eman duenez, pizgarri moduan, partehartzaile bakoitzari 100 euro ordainduko dio Udalak.
Etxean egindako produktuak edo baserrikoak salgai ipintzea da azoka horretan parte hartzeko baldintza bakarra; izan daitezke berdurak, kontserbak, gozoak, ogiak, kosmetika produktuak, egurrarekin landutakoak, artelanak Edozer, beti ere, etxean egindakoak badira.
Eguaztenera arte
Hala, parte hartu nahi izanez gero, urriaren 25a, eguaztena baino lehen eman behar da izena. Udaletxera jo beharra dago horretarako.
Iaz, esaterako, Aramaioko 15 lagunek parte hartu zuen azokan. Haiekin batera, kanpotik etorritako artisau eta baserritarrak ere izan ziren; guztira, 30 saltoki.