Meza aurretik eta ostean, hamarretakoa banatuko dute eta gero, urteko batzar nagusia egingo dute kofradiako kideek. Han, besteak beste, ikasturte berrirako egitasmoak aztertuko dituzte.
Eta aurtengo egitasmo nagusi moduan, ermitaren sarrera egokitu gura dute: "Eskailera nagusian baranda ipintzea gura dugu eta sarreran pasabidea egitea zailtasunak dituztenendako eta ume txikien kotxeendako", adierazi digu kofradiako presidente Juan Luis Nafarratek.
Apurketak eta beste
Eskaera horrekin batera, beste bat ere egin gura diote Diputazioari: "Ermitaren itxiturari irtenbideren bat eman diezaioten gura dugu. Izan ere, azkenaldian arazoak ditugu ermitara datozen zenbait gazterekin; burukomin dezenterekin ibili gara". Nafarratek kontatu digunez, apurtu egin dute itxituraren giltzarrapoa eta apurketak eragin dituzte komunetan; horrez gainera, afariak-eta egiten dituztenean zaborra bertan lagata joaten direla gaineratu digu: "Guk ondo ikusten dugu gazteek inguru hau aprobetxatzea baina gurako genuke modu zuzenean erabiltzea".