Bilboko Construcciones Olabarri enpresak egin du babes ofizialeko etxebizitzen proiektua, Lazaro & Asociados arkitektoek idatzi ostean. Guztira ere, 2.900.000 euro kostatu da.
Proiektuak dakarrena
Proiektuan ikus daiteke babes ofizialeko eraikin bakoitzak izango dituela erdi-sotoa, beheko solairua, lehenengoa, bigarrena eta teilatu azpikoa. Garajeak ere izango dituzte etxebizitzek, bakoitzak bana; beraz, 44, eta baita trastelekuak ere.
Ikus daiteke, baita ere, gas naturala izango dutela etxebizitzek eta, besteak beste, lurreko zein aireko telekomunikazioak eskuratu ahal izateko legeak zehazten duen azpiegitura. Eta legeak esandakoari jarraituz, eraikin guztiak egokituta egongo dira zailtasunak dituztenendako: atari zabalak, ateak, igogailuak eta bi etxebizitza gertu halako beharrak dituztenendako.
Etxeek 7.415,11 m2 okupatuko dute, Inazio Barrutia kalean. Udalak urbanizatuta dauka gunea eta azpiegiturak sartuta, eraikitzen hasteko. Lanak hasi ostean, 20 hilean bukatu beharko dituzte.