Iaz egindako azokan soberan geratu zitzaizkien liburuak eta aurten batutakoak ipiniko dituzte salgai Aramaixo Tropikaleko Gazte Asanbladakoek (ATGA) bigarren eskuko liburuen azokan, bihar, zapatua. Eta azokara doanak izango du zer aukeratu: entziklopediak, umeendako ipuinak, gaztetxoendakoak, klasikoen nobelak, modernoagoak, umeak ginenekoak Liburuak adinka sailkatuta ipiniko dituzte, erosketa errazteko. Hala adierazi digu azokaren antolatzaile Alex Aginagaldek. Hark gaineratu digu liburuen prezioak produktuaren egoeraren arabera finkatuko dituztela, euro batetik hasi (gehienak) eta, asko jota, bost euroraino.
Lehen esandako moduan, Bizente Goikoetxea plazan ipiniko dute liburu azoka, goizetik eguerdira arte; eguraldi ona bada kanpoan ipiniko dituzte mahaiak, eta euria bada, udaletxepean. Gazteen asmoa da ekitaldia musikarekin girotzea.
Aramaion inbertitzeko
Aginagaldek jakinarazi digunez, batutako dirua gazte asanbladarako izango da. Iaz gobernuz kanpoko erakunde bati eman bazioten ere, aurten gazteek erabaki dute erabiltzea taldearen autogestiorako; modu horretan, Udalarekiko mendekotasuna txikitzeaz gainera, ATGAk dirua izango du Aramaion kultura ekimen gehiago antolatzeko; beraz, orokorrean, dirua Aramaion berriro inbertitzeko erabiliko dute.