Kanporaketa horretan, bestelakoetan moduan, puntu gehien lortzen dituzten lehenengo bertsolari biek lortuko dute finalerako txartela. Besteak beste, zera egin beharko dute: agurra, zortziko nagusian hiruna bertso, zortziko txikian beste hiru bertso eta bakarkako saioa. Lierni Altuna aramaioarra izango dute gaia jartzen.
Saioa 20:30ean hasiko da, Bitorianoko elkartean.
Finala, berriz, datorren astean jokatuko dute, abenduaren 1ean, Gasteizko Roman Bajo ikastetxean, 19:00etan.
Doinuari garrantzia
Bagare lehiaketan parte hartzen dute Gasteizen ikasten duten Euskal Herri osoko bertsolariek eta Arabako bertsolariek. Lehiaketa berezia da, kantatzeko moduari edo doinuari garrantzi berezia ematen diolako.