Oilogor Ehiza eta Arrantza Elkarteko kide Eduardo Fernandezek kontatu digunez, Santikurutze-Kanpezutik ekarri dituzte biharko lehiaketarako amuarrainak. Gutxi gorabehera 70 kilo amuarrain askatuko dituzte Aramaio errekan. Hiruzpalau amuarrain izaten dira kilo bakoitzean, beraz, 210-280 amuarrain inguru.
Hala, gaur gauean "ezkutuan" harrapatzen dituztenak kenduta, gainerakoak gaztetxoen gozamenerako izango dira.
Izenematea, goizean
Arrantza Lehiaketan parte hartu nahi duenak, bide erraza dauka horretarako: 08:00etatik 09:00etara bitartean Ibarrara joan eta antolatzaileei izena eman. Eduardo Fernandezek esan digun moduan, lehiaketan parte hartzeko gogoaz gainera, arrantzarako kanabera eramatearekin nahikoa da.
Bestela, lehiakide bakoitzak nahi dituen tresneria guztiak eraman ditzake. Gero, Salazandik Goikoerrotako presaraino, nahi duten lekuan bota ditzakete kanaberak, arrantzan egiteko.
Ur gutxitxo errekan
Hain zuzen ere, norberaren abilezia eta pazientzia garrantzitsuak izango dira lehiaketarako. Dena dela, Aramaio errekak orain daraman ur kantitate urria ikusita, pentsatzekoa da lehiakideek erraz samar izango dutela biharkoan amuarrainak harrapatzea.
Guztiendako sorpresatxoa
Lehiaketa eguerdi partean bukatuko dela aditzera eman digute. Baita ere sariak izango direla, garaikurrak eta beste. Baina antolatzaileek gaineratu digute Arrantza Lehiaketa izan arren, ez dela horren garrantzitsua irabaztea, ekimenean parte hartzea, baizik. Halaber, parte-hartzaile guztiendako oparitxoren bat prestatu dutela jakinarazi digute, arrantzarako materiala, hain justu: txirrikak