Altsasuko Burunda Pilotalekuan jokatuko dute Euskal Herriko Ikastolen Konfederazioak antolatutako bertsolari txapelketa, eskolartekoa. 11:00etan izango da txikien saioa (16 urtera arte) eta 16:00etan, nagusiena. Araba, Gipuzkoa, Bizkaia, Nafarroa eta Iparraldeko eskoletako neska mutikoek parte hartuko dute. Eta lehen esandako moduan, txapelketan izango diren Arabako lau ordezkarien artean, bi Aramaiokoak dira: Xabier Igoa (13 urte) eta Mikel Serrato (12 urte).
Maiatzaren 21ean Gasteizko Armentia aretoan jokatutako txapelketan sailkatu ziren biak.
Guztiendako sariak
Zapatuko saioan, besteak beste zera egin beharko dute: agurra gai baten gainean, lau oinak emanda bertso bana eta binaka ofiziotan bina bertso zortziko txikian.
Txikien saioa eguerdi partean bukatuko da eta irabazleen izenak momentuan jakinaraziko dituzte. Dena dela, arratsaldeko saioaren ostean banatuko dituzte sariak. Txapeldun eta txapeldunordeendako sariez gainera, finalista guztiendako sari berezi bat izango da Euskal Herriko Ikastolen Konfederazioaren eskutik.